Home » CAMUUDMEDIA LIVE NEWS » Afar Qof Oo Ku Naf Waayey buundo ku duntay Maraykanka

Afar Qof Oo Ku Naf Waayey buundo ku duntay Maraykanka

Ugu yaraan afar ruux ayaa ku dhimatay 10 kalana dhaawac ayaa soo gaaray ka dib markii ay buundo ku duntay meel u dhaw jaamacadda Florida International University ee magaalada Miami, sida ay saraakiishu sheegeen.

Shaqaalaha gurmadka degdegga ah ayaa habeennimadii Khamiista wali baadigoobayay dad nool oo ku hoos xanniban burburka buundada lugta loogu talogalay.

Burburka buundada ayaa ku habsaday ugu yaraan siddeed gaari, sida ay booliisku sheegeen.

Ilaa iyo hadda ma cadda inta ruux ee buundada hoos maraysay marka uu shilkaasi dhacay.

Dave Downey oo ah madax dabdamiska ee deegaanka Miami-Dade ayaa habeenimadii Khamiista xaqiijiyay in ugu yaraan afar ruux ay halkaas ku dhimatay.

Ugu yaraan 10 ruux oo dhaawac ah ayaa lagu daweeyay xarunta caafimaadka ee Kendall Regional Medical Center, labo ka mid ah dadkaas ayayna xaaladdoodu “aad u liidataa” sida uu sheegay Mark McKenney oo ah madaxa qaliinnada.

BBC